ഇത് അഴിമതിയുടെ പൂക്കാലം ! ! ! പത്രത്തിലൂടെ പ്രാതലായും ടെലിവിഷനിലൂടെ ഐസ് ക്രീം പതയുന്ന വര്ത്തമാനങ്ങള് ആയും അഴിമതിയുടെ സുനാമികള് നമ്മെ വിഴുങ്ങുവാന് ഒരുങ്ങുന്നു. .. സ്പെക്ട്രത്തില് കാലുകുത്തി ലാവ്ലിന് കമ്പ് കൊണ്ടിളക്കിയപ്പോള് ഭാരതമെന്ന പാലാഴിയില് നിന്നും കോമണ് വെല്ത്ത് രാക്ഷസനും ആദര്ശ സൌധങ്ങളും തുടങ്ങി സര്ക്കാര് ജോലി വരെ ഉയര്ന്നു വന്നു. അഭിലാഷമുള്ളവരും രാജാക്കന്മാരും കലമൊടച്ചവനും കണ്ണില് കണ്ടവനും അവയെല്ലാം സ്വന്തമാക്കി .. പമോലിനിന് കുളിച്ചു "ടൈറ്റാനിയ " നിക്കറിട്ടവര് ഒടുവില് ആകാശത്തിന്റെ അതിര്വരമ്പുകള് താണ്ടി ബഹിരാകാശത്തിലേക്കും വര്ണ രാജികള് പടര്ന്നു കയറുന്ന കഥകള് ... ഇത് വെറും കഥയാകാം ...ഉന്നതങ്ങിലെ കഥ ... പക്ഷേ ശരാശരി ഇന്ത്യാ കാരില് എത്ര പേര് കൈകൂലി കൊടുത്തു കാണും ? എത്ര പേര് വാങ്ങി കാണും ?? കൈക്കൂലി , സ്വജന പക്ഷപാതം , ക്രമക്കേട്, പാരിതോഷികം ,തിരിമറി, നോക്ക് കൂലി , ചെലവു ചെയ്യല് തുടങ്ങി ഒരുപാടു വിളിപ്പേരുകള് അഴിമതിക്കുണ്ട്. സര്കാര് ഉദ്യോഗസ്ഥന് "ടിപ് " കൊടുത്തു എന്ന് മാത്രം ആരും പറഞ്ഞു കേട്ടിട്ടില്ല . അത് ബാറില് മാത്രം കൊടുക്കുന്നതാണല്ലോ ??? " ബംഗാളിലെ വേശ്യകള്ക്കിടയില് " ബക്ഷീഷ്" എന്നൊരു പ്രയോഗമുണ്ട്. കസ്റ്റമര് സംതൃപ്തനായാല് നല്കുന്ന തുക . " ഒരിക്കലും ബക്ഷീഷ് കൈയില് വാങ്ങുകയില്ല. സന്തോഷത്തോടെ അവരുടെ ബ്രായുടെ ഉള്ളിലേക്ക് വച്ച് കൊടുക്കണം. അപ്പോള് അവള് ആ കൈ നെഞ്ചോട് അമര്ത്തി പിടിച്ചു സ്വപ്നങ്ങള് ചത്ത് പൊങ്ങിയ മിഴിയിണകളില് പ്രാര്ത്ഥനയുടെ അദൃശ്യ സങ്കല്പ്പങ്ങള് വിരിയിച്ചുകൊണ്ട് പറയും " ഫിര് ആന മേരി ജാന് " . സോനാ ഗച്ചിയിലെയും ഇസ്ലാമ്പുരിലെയും അതുപോലെ തന്നെ സിലിഗുരിയിലെയും ക്ഹോട്ടികളിലെ പുണ്യ ജന്മങ്ങള്ക്ക് "മാലിക്കിന് " അറിയാതെ സ്വന്തമായി കിട്ടുന്ന തുക ...അതൊക്കെ വഴിക്ക് വന്ന ഓര്മ്മകള് , വേവലാതികള്, അത് പോകട്ടെ .... സാധാരണ മലയാളികളില് കൈക്കൂലി നല്കാത്തവര് വിരളമാണ്... പക്ഷേ അഴിമതിയുടെ സാന്ദ്രത കേരളത്തിലെ ഓഫീസുകളില് തുലോം കുറവാണു ! ! ! ഞെട്ടി പോയി അല്ലെ ?? അതെ മറ്റു ഇന്ത്യന് സംസ്ഥാനങ്ങളെ അപേക്ഷിച്ച് ഇവിടെ വളരെ നല്ല കാലാവസ്ഥയാണ്. .. തമിഴ് നാട്ടിലോ ബീഹാറിലോ രാജസ്ഥാനിലോ പോയാല് കാര്യങ്ങള് മനസിലാകും ...
കൈക്കൂലി സന്തോഷടോടെ കൊടുക്കുവാന് നമ്മള് തയ്യാറാണ് . നമ്മുടെ കാര്യം താമസിപ്പിക്കാതെ ചെയ്തുതന്നാല് ... പെട്ടെന്ന് ചെയ്തു തന്നാല് കൂടുതല് സന്തോഷം ... അങ്ങനെ സന്തോഷത്തോടെ നമ്മള് " പണം " കൊടുക്കുന്നു. " ഇതിനെയും ബക്ഷീഷ് എന്ന് വിളിക്കാമോ ? ക്ഷമിച്ചു കള ... ഇനി എന്റെ ഒരു കഥ പറയാം ...അഴിമതിയെന്ന മഹാസാഗരത്തിലെ ചെറുമീനുകള്ക്ക് തീറ്റ കൊടുത്ത കഥ .. ഞാന് കൊടുത്ത ആദ്യ കൈക്കൂലി ....
വളരെ പണ്ടൊന്നുമല്ല ഈ കഥ നടന്നത്... , ഒരു വ്യാഴ വട്ടം മുന്പാണ്. വളരെ ചെറു പ്രായത്തില് കേരളം വിട്ടു പോകേണ്ടിവന്നതിനാല് പല സന്ദര്ഭങ്ങളിലും മലയാള നാടിന്റെ " പള്സ്" തിരിച്ചറിയുവാന് സാധിച്ചിരുന്നില്ല . അതിനാല് ഓരോ ലീവ് കാലവും ഓരോ പഠന ക്ലാസ്സുകള് ആയിരുന്നു. വര്ഷത്തില് ഒരിക്കല് അവധിക്കു വരുമ്പോള് നാട്ടുകാരുടെ കുശലങ്ങളില് പ്രധാനം " കല്യാണം" തന്നെ ആയിരുന്നു . " എന്താ കെട്ടാത്തതു " ചോദ്യം കേട്ട് മടുത്ത കാലം . ആഗ്രഹം ഇല്ലാത്തതു കൊണ്ടായിരുന്നില്ല . വയസു 30 കഴിഞ്ഞിരിന്നു. പക്ഷെ കേറി കിടക്കുവാന് കൂരയില്ലാത്തവന് കൂടെ കിടക്കുവാന് പെണ്ണിനെ തിരയുന്നതിലെ ഔചിത്യം എന്നെ പിറകൊട്ടടിച്ചു. അക്കാലത്തു മൊബൈല് ക്യാമറ ഇല്ലായിരുന്നെങ്ങിലും മനുഷ്യ ശക്തിയുടെ വക്ര പ്രവാഹത്തിന് കുറവില്ലായിരുന്നു എന്നറിയുക . സ്വഭാവ ദൂഷ്യമോ ജാതക ദോഷമോ അല്ല മറിച്ച് വീടില്ലാത് കൊണ്ടാണ് മംഗല്യം താമസിക്കുന്നത് എന്നെനിക്കു ബോധ്യമായി . ഈ അവസ്ഥയില് എന്റെ അടങ്ങാത്ത അഭിനിവേശവും നാട്ടുകാരുടെ ചോദ്യങ്ങളുമാണ് ഒരു വീട് വയ്ക്കണം എന്ന ചിന്ത എന്റെ ചെറിയ മനസിലേക്ക് കോപ്പി ചെയ്യിച്ചത് . ആ പരിപാടിക്ക് മുന്നോടിയായി അന്നും ഇന്നത്തെ പോലെ ലോണ് തന്നെ ആയിരുന്നു ആശ്രയം. മനുഷ്യ കുലത്തില് ഒരുപക്ഷെ വീട് വയ്ക്കുവാന് വായ്പ എടുക്കാത്തവര് വിരളമായിരിക്കും. അങ്ങനെ ഒരു അവധികാലത്ത് എന്റെ മോഹവും പേറി ഞാന് വീട് പണിക്കുള്ള പണം കണ്ടെത്താന് ബാങ്കായ ബാങ്കൊക്കെ കയറി ഇറങ്ങി. " ഇത്രയേറെ ഗുലുമാല് പിടിച്ച പണിയാണ് ഇതെന്ന് അന്ന് എനിക്ക് മനസിലായി. ജാമ്യം , കടപത്രം , ബാദ്ധ്യത. , ലീഗല് ഒപ്പിനിഒന്, കൈവശം , പറ്റു ചിട്ടി (കരചീട്ട് ) ,ഗഗാന് , സ്കെച് , പ്ലാന് ,തുടങ്ങിയ സാങ്കേതിക പദങ്ങള് കേട്ട് ഞാന് ഞെട്ടി. തീര്ച്ചയായും ഒരു തുടക്കകാരനെ ഞെട്ടിക്കുവാന് ഈ പദങ്ങള്ക്കും അവിടുത്തെ സാറിന്മാര്ക്കും കഴിഞ്ഞു. പക്ഷേ എന്റെ ഉള്ളിലെ തീവ്ര കാമനകളെ കൈയാമം വയ്ക്കുവാന് ഈ പരീക്ഷണങ്ങള്ക്ക് കഴിഞ്ഞില്ല. അങ്ങനെയാണ് എന്റെ സ്വന്തം എന്ന് അഭിമാനിച്ചിരുന്ന നാഴി മണ്ണിന്റെ ആധാരവും മറ്റു അനസാരികളും പേറി "ബാദ്ധ്യത.സര്ട്ടിഫിക്കറ്റ് " വാങ്ങുവാന് ഞാന് കടമ്പനാട് രജിസ്ട്രാര് ഓഫീസില് എത്തുന്നത് . വൈദേശിക ആധിപത്യത്തിന്റെ ഒഴിഞ്ഞു മാറാത്ത ആടയാഭരണങ്ങള് പോലെ മനുഷ്യനെ ഭയപ്പെടുത്തുന്ന കറുത്ത നോട്ടിസ് ബോര്ഡിലെ നരച്ച ആജ്ഞകളും, പൊടിപിടിച്ച ഫയലുകളും , മാറാല പിടിച്ച ഫാനും , തടിച്ച രജിസ്റ്റെരുകളും, അധികാര പ്രമത്തതയുടെ മുനയൊടിഞ്ഞ ഗര്വുകള് ഉപേക്ഷിക്കാന് തയ്യാറല്ലാത്ത മരവിച്ച മുഖങ്ങളും, ഗതകാല ഭരണ കൂടങ്ങളുടെ വിദൂര പ്രതിബിംബമായപ്പോള് സട കൊഴിഞ്ഞ ബൂര്ഷ്വാസിയും സിംഹാസനത്തിലേറിയ മര്ദ്ദിതനും കറുത്ത പൂച്ചകളുടെ കാവലോടെ പളുങ്ക് പാത്രങ്ങളില് അമൃത് നുണഞ്ഞു അരണ്ട വെളിച്ചത്തില് കാത്തിരുന്നു... മെതിയടിയിലെ ചെളി കളയുവാന് എന്നെയും കാത്ത്.... അപേക്ഷ എവിടെ കൊടുക്കണം എന്ന് പോലും അറിയില്ല. ഇന്ത്യക്കാരെ നോക്കുന്ന പാക്കിസ്ഥാന് പട്ടാളക്കാരെ പോലെ പല സാറിന്മാരും സാറത്തികളും എന്നെ ചൂഴ്ന്നു നോക്കി. കൂട്ടത്തില് അല്പം പ്രായം ചെന്ന സാറിന്റെ കസേരയ്കരികിലേക്ക് ഞാന് നീങ്ങി. എന്തോ പറയാന് ഞാന് ശ്രമിക്കുന്നതിനു മുന്പ് കനത്ത ശബ്ദത്തില് അദ്ദേഹം ചോദിച്ചു " ബാദ്ധ്യത ആണോ " ഞാന് തല കുലുക്കി. മുഖം പ്രത്യേക രീതിയില് കോട്ടി അദ്ദേഹം പുറകോട്ടു ചൂണ്ടി ഒരു സീറ്റ് കാട്ടി. അങ്ങോട്ട് ചെല്ലാന് അങ്ങ്യം കാണിച്ചു. ഞാന് അവിടേക്ക് ചെന്നു . സത്യം പറഞ്ഞാല് ഞാന് സന്തോഷം കൊണ്ട് മതി മറന്നു. അവിടെ സുന്ദരിയായ ഒരു പെണ്കുട്ടി ആയിരുന്നു ഇരുന്നത്. ഞാന് അപേക്ഷ കാണിച്ചു. കാര്യം പറഞ്ഞു. ആ കുട്ടി പൂര്ണ ചന്ദ്രനെ പോലെ ചിരിച്ചു. എന്റെ മനസ്സില് നിലാവ് നിറഞ്ഞു. " എനിക്ക് അത്യാവശ്യമാണ്" " ശരി താമസിപ്പിക്കാതെ തരാം "ഭവതി പറഞ്ഞു. " ഞാന് നാളെ വരട്ടെ " എന്റെ ചോദ്യത്തിന് പഞ്ച ബാണങ്ങള് നിറച്ച പുഞ്ചിരി പകരം സമ്മാനിച്ചു. " ദൈവമേ ധന്യമായി , ഈ സുന്ദരിയെ പോലെ എല്ലാ ജീവനക്കാരും ആയിരുന്നുവെങ്കില് കേരള സര്വിസ് എത്ര നന്നായേനെ.
രാത്രിയില് ഉറക്കം വന്നില്ല . ആ കുട്ടിയെ തന്നെ ഓര്ത്തു കിടന്നു. വേണ്ടാത്ത മോഹങ്ങള് ഉള്ളിലേക്ക് പതഞ്ഞുയരുന്നു.
ഏകാന്തതയുടെ ചില്ല് ജാലകങ്ങളില് അവാച്യമായ അനുഭുതികളുടെ തുഷാര ബിന്ദുക്കള് ഉറകൂടുന്നത് ഞാനറിഞ്ഞു .
പിറ്റേന്ന് രാവിലെ തന്നെ ഉണര്ന്നു. കൂടുതല് പ്രസരിപ്പുള്ളത് പ്രഭാതത്തിനോ എനിക്കോ എന്ന് വ്യക്തമല്ലായിരുന്നു .
പത്തു മണിക്ക് മുന്പ് തന്നെ ഓഫീസിന്റെ വരാന്തയില് ഇരിപ്പുറപ്പിച്ചു. എന്തിനാണ് എത്ര നേരത്ത് വന്നത് എന്ന എന്റെ ചോദ്യത്തിന് എനിക്ക് തന്നെ ഉത്തരം ഇല്ലായിരുന്നു. കേരളത്തിലെ ഓഫീസ് സമയം 10 ആണെങ്കിലും പണി 11 മണിക്കേ തുടങ്ങു എന്ന് പലരും പറഞ്ഞിരുന്നു. പക്ഷേ ആ സുന്ദരിയെ ദൂരെ നിന്നും കാണാന് എന്റെ മനസ് മോഹിച്ചു പോയി. പത്തു മണി മുതല് ജീവനക്കാര് വന്നു തുടങ്ങി. പക്ഷേ ഞാന് പ്രതീക്ഷിച്ച ആള് മാത്രം വന്നില്ല. സമയം മുന്നോട്ടു പോയി. എന്റെ മോഹങ്ങളില് കരിവാവ് കലര്ന്ന പ്രതീതി . പെട്ടെന്ന് ഞാന് " ബാദ്ധ്യത " ഓര്ത്തു പോയി. ഓഫീസിന്റെ ഉള്ളിലേക്ക് ഞാന് ചെന്നു. " ആ പെണ്കുട്ടിയുടെ സീറ്റിലേക്ക് കൈ ചൂണ്ടി ചോദിച്ചു" " ആ സാര് വന്നിട്ടില്ലേ" " " ഇല്ലാ , ഇന്ന് ലീവിലാണ് " എന്റെ മനസ്സില് പെരുമ്പറ കൊട്ടി. എന്നിട്ട് ഇന്നലെ പറയാഞ്ഞത് എന്താണ് ? രാവിലെ ഞാന് ഒരുങ്ങി കെട്ടി വന്നില്ലേ . ദേഷ്യവും സങ്കടവും അടക്കാനാവാതെ ഞാന് വീട്ടിലേക്കു പോയി. അന്നും ഞാന് കണ്ട കിനാവില് അവള് കടന്നു വന്നു. ക്ഷണിക്കാത്ത അതിഥി ആയി . അടുത്ത ദിവസം രാവിലെ തന്നെ രജിസ്ട്രാര് ഓഫീസിന്റെ തിണ്ണയില് സ്ഥാനം പിടിച്ചു. പത്തുമണിക്ക് തന്നെ എന്റെ സ്വപ്ന സുന്ദരി എത്തി. ആ മുഖം കണ്ടപ്പോള് എന്റെ സകല പ്രയാസങ്ങളും മാറി. അലാസ ഗമനിയായ ഈ അപ്സരസിനോടാണോ താന് മനസാ നീരസം പ്രകടിപ്പിച്ചത് . തിലകക്കുറി ചാര്ത്തിയ ആ സുന്ദര മുഖം എന്റെ ഉള്ളില് കിനാക്കളുടെ മന്ദാര പുഷ്പങ്ങള് വിരിയിച്ചു. എങ്കിലും പെട്ടെന്ന് ഞാന് യാഥാര്ത്ഥ്യത്തെ തിരിച്ചറിഞ്ഞു. എന്റെ " ബാധ്യത " ഞാന് ഓര്ത്തു. ഉള്ളില് പ്രണയം കിനിയുന്ന പ്രണയം പൊത്തിയമര്ത്തി ഞാന് വന്ന കാര്യം പറഞ്ഞു. സുസ്മേര വദനയായി അവള് പറഞ്ഞു " അയ്യോ റെഡി ആയില്ല" " ഇന്നലെ ഞാന് ലീവ് ആയിരുന്നു" എനിക്ക് സന്തോഷം ആയി . ഞാന് ചോദിച്ചു " എപ്പോള് വരണം "? " രണ്ടാഴ്ച കഴിഞ്ഞു വരൂ , ഇവിടെ ഇപ്പോള് ഓഡിറ്റ് നടക്കുകയാണ് " ഞാന് ഞെട്ടിപ്പോയി " "അയ്യോ" അറിയാതെ ഒരു വിളി ഉള്ളിലുണരുന്നത് ഞാനറിഞ്ഞു. ലീവ് തീരുവാന് കുറച്ചു ദിവസമേ ഉള്ളു. അതിനുമുന്പ് ലോണ് ശരിയാക്കണം. " എനിക്ക് വളരെ അത്യാവശ്യമാണ് ' ഞാന് കെഞ്ചി നോക്കി . " പരമാവധി ശ്രമിക്കാം " അവള് ഉറപ്പു പറഞ്ഞു " എവിടെ നിന്നു തിരിയാന് സമയമില്ല" ആ കുട്ടി പറഞ്ഞപ്പോള് ഞാന് അവിസ്വസിച്ചില്ല. പ്രത്യേകിച്ചും എന്റെ ഉള്ളില് പ്രതിഷ്ടിച്ച കനക വിഗ്രഹത്തിന്റെ വാക്കുകളെ. ഇച്ഛാഭംഗത്തിന്റെ കരിമഷി എന്റെ ചിന്തകളില് പടര്ന്നു കയറി . ഉച്ച വെയിലിനെ കൂസാതെ കവലയിലേക്കു നടന്നു. അപ്പോഴാണ് ആധാരമെഴുതുന്ന മത്തായി കുട്ടി ചേട്ടനെ കണ്ടത്. അദ്ദേഹം കുശലം ചോദിച്ചപ്പോള് ഞാന് കാര്യം പറഞ്ഞു . " ആ വട്ട മുഖമുള്ള ക്ലെര്ക്ക് ആണോ ? നോട്ട് കിട്ടാതെ അവള് ഒന്നും ചെയ്യില്ല " 'ദൈവമേ' എന്റെ സകല മോഹവും തകരുകയാണോ ? ഞാന് നെയ്ത കിനാക്കള് ? അവള് കൈക്കൂലി വാങ്ങുകയോ ? 'ഇല്ലാ ' .എന്റെ മനസ് മന്ത്രിച്ചു. വീണ്ടും ഞാന് സ്വപ്നത്തിന്റെ നീല മേഘ മേലാപ്പുകളില് നിന്നും താഴെ ഇറങ്ങി. പരുക്കന് ഭൂമിയിലൂടെ വീണ്ടും രജിസ്ട്രാര് ഓഫീസിന്റെ പടവുകള് കയറി. ഞാന് ആ സുന്ദരിയുടെ അടുത്ത് ചെന്നു. അവള് വീണ്ടും ചിരിച്ചു. ഉള്ളു നിറയ്ക്കുന്ന ചിരി. പോക്കെറ്റില് നിന്നും ഒരു നൂറു രൂപ നോട്ട് എടുത്തു അവള്ക്കു നേരെ നീട്ടി. എന്റെ ശരീരത്തില് ഒരു വിറയല് ബാധിച്ചു. എന്റെ പ്രണയ സങ്കല്പങ്ങളുടെ ശവ പറമ്പിലെക്കുള്ള പ്രയാണത്തില് ആ നൂറു രൂപ നോട്ടിരുന്നു വിറച്ചു. ഒരു പൂക്കാവടി പോലെ.. പെട്ടെന്ന് അവള് മേശ വലിപ്പു തുറന്നു. രൂപ അതിലിടാന് ആംഗ്യം കാട്ടി. തുറന്നു കിടന്ന മേശ വിരിപ്പിലേക്ക് ഇട്ടുകൊടുത്തു. "അല്പം വെയിറ്റ് ചെയ്യൂ " അര മണിക്കൂറിനകം എനിക്ക് സര്ടിഫിക്കറ്റ് കിട്ടി. അവള് വീണ്ടും ചിരിച്ചു. അവളുടെ സുന്ദര മുഖത്തെ ആര്ത്തിയുടെ വിഷ തേളുകള് ബീഭല്സമാക്കുന്നത് ഞാന് കണ്ടു. എന്റെ മനസ്സില് അപ്പോള് നിസംഗത മാത്രമായിരുന്നു. "ബക്ഷീഷ്" നല്കിയവന്റെ നിസംഗത ..........
നന്നായിട്ടുണ്ട്...
മറുപടിഇല്ലാതാക്കൂ'ബക്ഷീഷ്'ഓഫീസില് ഉപയോഗിക്കാന് ഒരു പുതിയ പ്രയോഗം ലഭിച്ചു.പരിചയപ്പെടുത്തിയതിന് നന്ദി.
ആശംസകള്
മനസ്സ് നിറയാതെ നല്കിയ ഒരു "ബക്ഷീഷ്", .അല്ലെ.. നന്നായി കേട്ടോ..
മറുപടിഇല്ലാതാക്കൂമുമ്പ് നല്ലവനായ ഒരു ബാങ്ക് മാനേജര് വായ്പ അനുവദിക്കാമെന്ന് വാഗ്ദാനം ചെയ്തതോടെ ഞാനും ഇതേ ആവശ്യത്തിന്ന് പോയിട്ടുണ്ട്. ആവശ്യത്തിന്ന് സംഗതി കിട്ടാഞ്ഞതിനാല് ഞാന്
മറുപടിഇല്ലാതാക്കൂശ്രമം ഉപേക്ഷിച്ചു. ബക്ഷിസിനെക്കുറിച്ച് ഞാന്
ആലോചിച്ചിരുന്നില്ല.
തമിഴ് നാട്ടിലെ കാര്യം എന്റെ ഇക്കാക്ക പറഞ്ഞ് കേട്ടിട്ടുണ്ട്.ഓരോ പണികള്ക്കും ഫിക്സഡ് റേറ്റ് ആണത്രേ.പക്ഷെ,ഒരു ഗുണമുണ്ട്.കാര്യം നടക്കും.
മറുപടിഇല്ലാതാക്കൂഅഴിമതിക്കഥകള് സാര്വത്രികമായ ഇക്കാലത്ത് ഇങ്ങിനെയൊരു പോസ്റ്റ് അവസരോചിതമായി.
അധികാരത്തെ ബലാല് സംഗം ചെയ്യാന് പ്രേരിപ്പിച്ച നിഴമ വേശ്യക്ക് നകിയ ബ്ക്ചീസ്
മറുപടിഇല്ലാതാക്കൂഅനുഭവം മനോഹരം അല്ലെങ്കിലും വിവരണം മനോഹരമായി
@ venpal... വളരെ നന്ദി... തീര്ച്ചയായും ഇ പദത്തെ ജനകീയമാക്കണം ...
മറുപടിഇല്ലാതാക്കൂ@ ശ്രീജിത്ത്... വായനക്കും കമന്റിനും നന്ദി..
@ kerladasanunni സര്... ഞാന് ഏതായാലും ലോണെടുത്ത് വീട് വച്ചു... നന്ദി
@ Mayflowers .. ഇവിടെ കൈക്കൂലി കൊടുത്താലും കാര്യം നടക്കൂല്ല ... tks എ ലോട്ട്
@ കൊമ്പന് .... സ്നേഹ വാക്കുകള്ക്കും പ്രോത്സാഹനത്തിനും ഒത്തിരി നന്ദിയുണ്ട്...
നന്നായി എഴുതി..
മറുപടിഇല്ലാതാക്കൂനന്നായിട്ടുണ്ട്..'ബക്ഷീഷ്' ഉച്ചരിക്കാൻ പാടുപെട്ടു..എന്റെ പേര് ഉച്ചരിക്കുന്നതനേക്കാൾ കഷ്ടം...
മറുപടിഇല്ലാതാക്കൂസര്ക്കാര് ആഫീസുകളില് കൈക്കൂലി വാങ്ങാത്തവന് കരിങ്കാലിയായി മുദ്ര കുത്തപ്പെടുന്നു. നിര്ഭാഗ്യം! കേരളത്തില് സ്ത്രീകളാണ് ദയയില്ലാതെ ഇത് ചോദിക്കുന്നത് .
മറുപടിഇല്ലാതാക്കൂ